د خوړو نړیوال سازمان: د اړمنو افغانانو لاسنیوي لپاره ۱ میلیارد ډالرو ته اړتیا ده

د خوړو نړیوال سازمان یا WFP وايي، د روان زېږیز کال په اوږدو ۱۲ هېوادونو او مرستندویه بنسټونو له افغان ولس سره نغدي او  د خوراکي توکو مرسته کړې ده.

د کابل۲۴ د راپور پر اساس، د دغه پروګرام مسوولین وايي، د افغانستان په اوسني وضعیت کې مېلیونونه کسان د لوږې له ګواښ سره مخ دي او زیاتوي، د اړمنو د لاسنیوي لپاره یو میلیارد ډالرو ته اړتیا ده.

د خوړو نړۍوال پروګرام وايي، دې بنسټ په زېږدیز روان کال کې د نوي زیلنډ، هند، سویلي کوریا، اروپايي ټولنې، د اسلامي پراختیايي بانک، ملګرو ملتونو او خصوصي مرستندویانو په ګډون له دولسو هېوادونو او بنسټونو مرستې ترلاسه کړې دي.

تر دې مخکې، د سرې میاشتې نړۍوالې کمېټې په یوه راپور کې ویلي وو چې په افغانستان کې نږدې ۲۰ مېلیونه کسان چې د ټول نفوس ۴۴ سلنه جوړوي، کافي خوړو ته لاسرسی نه‌لري.