د امریکا بهرنیو چارو وزارت په یوه اعلامیه کې ویلي، استازو د دوحې په خبرو کې له طالبانو غوښتي چې د بشري حقونو د ناوړه حالت رامنځته کوونکې پالیسۍ بېرته واخلي.
د کابل۲۴ د راپور پر اساس، په افغانستان کې د طالبانو د حکومت د بهرنیو چارو وزارت هم ویلي، په دغو دوو ورځنیو خبرو کې د دواړو لورو تر منځ د نورو موضوعاتو تر منځ پر باور جوړونې، د افغانستان د بانکي زېرمو پر آزادېدو، له نشهيي توکو سره پر مبارزه او بشري حقونو خبرې شوې.
امریکايي پلاوي له طالبانو د امریکايي وګړو د ژر او بې قید او شرطه خلاصېدو غوښتنه هم کړې او ټینګار يې کړی چې دا رنګ نیونې د مثبت تعامل پر وړاندې جدي خنډ دی.
د امریکا د بهرنیو چارو وزارت استازو او په افغانستان کې د طالبانو د حکومت لوړپوړي پلاوي د یکشنبې او دوشنبې په ورځو د تړلو دروازو تر شا خبرې او سلامشورې کړې.
د افغانستان لپاره د امریکا ځانګړي استازي توماس وېسټ دا له لوپوړو طالب استازو سره په افغانستان کې د امریکا د حیاتي ګټو په تړاو خبرې بللې.
هغه دا خبرې دوه اړخیزې، په جزئياتو او صادقانه بللې او د دواړو افغانانو او د امریکا د ګټو خوندي کولو لپاره يې دوام اړین بللی.
هغه ليکلي په دغو ناستو کې د افغانستان پر اقتصاد، بشري حقونو، بشري اړتیاوو، امنيتي ژمنو، ټولګډون والي او د نشهيي توکو پر ضد مبارزه خبرې شوې.
له دغې ناستې وروسته د امریکا د بهرنیو چارو وزارت په اعلامیه کې راغلي چې امریکايي چارواکو د افغانانو د ملاتړ په موخه د باور رامنځته کولو ساحې په ګوته کړې.
د امریکا بهرنیو چارو وزارت په اعلامیه کې په افغانستان کې د بشري حقونو د بحران، نیونو، د رسنیو د ځپنې او مذهبي محدودیتونو په اړه ژوره خواشيني ښودل شوې او پکې راغلي، امریکايي پلاوي له طالبانو غوښتي خپل هغه سیاستونه بدل کړي چې د بشري حقونو په تېره بیا ښځو او نجونو او زیان منونکو ټولنو حالت یې خراب کړی.
د افغان ښځو، نجونو او بشري حقونو لپاره د امریکا ځانګړې استازې رینا امیري هم پر ټویټر ليکلي چې د دغو دوو ورځو ناستو په اوږدو کې يې “په وار وار په افغانستان کې د بشري حقونو د حالت د سمون پر بيړنۍ اړتیا ټینګار” کړی.
هغې زیاته کړې چې “د ښځو او نجونو پر وړاندې د محدودیتونو د لیرې کولو، تعلیم او کار ته د لاسرسي، د بندیانو خلاصون، د جسمي مجازاتو ختمولو، په رسنیو او بیان آزادیو د فشار ختمولو” غوښتنه هم کړې او دغه راز يې ټینګار کړی چې “د امنیت، اقتصادي پرمختیا او ثبات د ترلاسه کولو لپاره، د هیلو او بشري پانګو ساتلو او له نړیوالې ټولنې سره د دریځ په ښه کولو کې، بشري حقونو ته درناوی اساسي ارزښت لري”.
د امریکا د بهرنیو چارو وزارت وايي امريکايي چارواکو د انفلاسیون کمېدو او په ۲۰۲۳ کال کې د صادراتو او وارداتو د ودې په تړاو هم له طالب چارواکو اورېدلي او د افغانستان د اقتصادي ثبات اړوند يې نورو تخنيکي بحثونو ته هم چمتووالی ښودلی.
طالب پلاوي هم د افغانستان پر بانکونو د ډېرو محدودیتونو ليرې کېدل یو مثبت بدلون بللی.
د طالبانو د حکومت د بهرنیو چارو وزارت ویلي چې د دواړو لورو تر منځ د باور جوړونې، په دغه لاره کې د عملي ګامونو اخيستلو، تورو لستونو او بندیزونو لېرې کولو، د افغانستان بانک زېرمو ازادولو، د افغانستان اقتصادي ثبات ساتلو، مخدره موادو پر خلاف د مبارزې او بشري حقونو پر موضوعاتو خبرې شوې.
امریکايي پلاوي پر دې هم اعتراف کړی چې پر ملکیانو ستر ترهګریز بریدونه کم شوي.
په اعلامیه کې راغلي چې امریکايي پلاوي د طالب چارواکو دا ريپوټونه هم اورېدلي چې د دوی د حکومت لخوا پر نشهيي توکو بندیز د دغو توکو پر کرکیله کې د پام وړ کموالي لامل شوی. که څه هم امریکايي چارواکي لا هم د نشهيي توکو د ځینو ځانګړو ډولونو د پلور او قاچاق اړوند اندېښنه ښودلې.
