د نړۍ په کچه بېلابېلو مسلمانو هېوادونو د سويډن پلازمېنه سټاکهوم کې د يوه شخص له خوا د قرآن کريم د نسخې سوځولو پېښه په کلکه غندلې ده.
پېښه چهارشنبې د لوی اختر پر لومړۍ ورځ د سټاکهوم جومات مخې ته رامنځ ته شوه. د قرآن کريم د سوځولو پېښه کې يو عراقي الاصله کس هم لاس لري چې د احتجاج لپاره یې له محکمې رسمي اجازه اخيستې وه.
د کابل۲۴ د راپور پر اساس، که چېرې سويډني چارواکو دې ډول احتجاج ته اجازه ورکړې وي، داسې شونتيا شته چې ترکيه به يو ځل بيا ناټو کې د سويډن له غړيتوب سره مخالفت وکړي.
د ترکیې د بهرنیو چارو وزیر ویلي د سویډن په ستاکهوم کې له یوه جومات د باندې د قرآن کریم سوځول کېدای شي له ناټو سره د سویډن د یو ځای کېدو پروسه پېچلې کړي. سويډن د ناټو د غړيتوب لپاره د ترکيې ملاتړ ته اړتيا لري.
ده په یوه ټویټ کې د قرآن کریم سپکاوی غندلی او ویلي یې دي چې د بیان د ازادۍ په نوم د اسلام ضد مظاهرو اجازه ورکول د منلو وړ نه دي.
په بیان کې دا هم راغلي چې “د مسلمانانو په سپېڅلو ورځو کې د دې ډول اعمالو اجازه ورکول د نړۍ نژدې دوو میلیاردو خلکو ته سپکاوی دی. “
دغه وزارت په ټولو اسلامي هېوادونو او سازمانونو غږ کړی چې په ټوله نړۍ کې د دا ډول ناوړه کړنو په ځواب کې اړین ګامونه پورته کړي.
د پاکستان د بهرنیو چارو وزارت هم ویلي، د بیان د ازادۍ او احتجاج په پلمه د تاوتریخوالي هڅول په هېڅ صورت د توجیه وړ نه دي.
د مراکش د بهرنیو چارو وزارت دغه پېښه غیر مسؤلانه عمل بللې او ویلي یې دي، دا ګام داسې حال کې شوی، چې مسلمانان د خپل یوه سپېڅلي اختر لمانځنه کوي.
سعودي هم دغه پېښه غندلې او په خپله اعلامیه کې یې ویلي، چې دا ډول کړنې د کرکې او توکم پالنې د زیاتېدو لامل کېږي.
د روان کال په جنورۍ مياشت کې په سويډن کې د قرآن کريم د سوځولو په اړه هم مسلمانو هېوادونو توند غبرګون ښودلی و.
په ورته وخت په عراق کې د سويډن سفارت مخ ته لسګونو کسانو د قرآن کريم د سوځولو پر ضد لاريون وکړ او د دغه سفارت انګړ ته ورننوتل. په ټولنيزو رسنيو خپرو شويو ويډيوګانو کې ښکاري چې لسګونه کسان د سفارت انګړ کې دننه ګرځي.
