مسئولان وزارت معارف طالبان، گفته اند که عالمان دین را در اداره‌های دولتی جذب می‌کنند و مدرسه‌های دینی را به رسمیت می‌شناسند.
به گزارش کابل۲۴، سیدغیاث‌الدین، مشاور وزارت معارف که روز گذشته در محفلی در میان مردم در شهر میمنه، مرکز فاریاب صحبت می‌کرد، گفته است که در دولت‌های گذشته در حق عالمان دین جفا شده بود و دولت‌ها به آن‌ها ارزشی قایل نبودند.
به گفته‌ی مشاور وزارت معارف، حکومت طالبان تصمیم گرفته است که ۲۰ هزار بست خالی را برای جذب عالمان دین در اداره‌های دولتی، برای آنان اهدا کند.
سیدغیاث‌الدین، می‌افزاید که مدرسه‌های دینی را به رسمیت می‌شناسند و مدرسان را در بست‌ها جابه‌جا می‌کنند.
این در حالی است که عالمان‌دین در این محفل از نبود پشتیبانی از دانش‌آموزان مدرسه‌ها و مدرسه‌های دینی خصوصی، انتقاد کردند و خواستار توجه جدی دولت طالبان در این بخش‌ها شدند.
در یک سال اخیر نیز عالمان دینی زیادی در دستگاه حکومت جابجا و جذب شده‌اند.
